鼎泰豐 Din Tai Fung

想當年去親台灣旅行o既人
最緊張o既係行程裡面會唔會去食鼎泰豐
記得第一次去食o既時候真係好驚喜
早幾年前香港o係黃埔都開過一間
不過食物 d 質素真係慘不忍睹，結業都係合理
今次佢再返黎，聽講係台灣直接經營，個心都定d

佢o岩o岩開張o既時候有朋友去過
話佢要由七點等到九點先入到去食
我心諗，過左咁耐，熱潮都應該過去喇卦
我六點鐘去到，竟然冇人等位，可以直入
不過原來只係我早到先至咁幸運
因為六點半過後，出面已經擠滿人群

去鼎泰豐o既目的，就係為左我喜愛o既蟹粉小籠包
另外我地仲叫左烤麩、炸排骨、蝦仁燒賣、油麥菜
菜肉餛飩、蝦仁蛋炒飯、紅燒牛肉麵，仲有 d 甜品
上菜o既速度好快，叫完之後幾分鐘就有野食
野食方面，冇野係特別好食，但都冇野係好難食
我自己就幾鍾意個紅燒牛肉麵，但只係因為個人喜好

不過有一樣野我係好唔鍾意
就係唔知點解佢開到 d 冷氣鬼死咁凍
d 小籠包同燒賣o係佢放低時即刻食，就幾好o既
轉頭食第二粒o既時候，d 皮已經硬晒，仲腥腥地添
其他o既食物都一樣凍得好快
可能想 d 客食完快 d 走卦

今次o既感覺都算 ok 啦
起碼好過以前黃埔o個間好多
不過如果要我排成個鐘先入到去
咁我就覺得唔值得喇